បាត់ដំបង៖ រដ្ឋបាលខេត្តបាត់ដំបង បានប្រកាសថាខេត្តនឹងរៀបចំពិធីបុណ្យអុំទូក និងបណ្តែតប្រទីបនៅតាមបណ្ដោយដងស្ទឹងសង្កែ ក្នុងក្រុងបាត់ដំបងដែលប្រព្រឹត្តទៅរយៈ ពេល០២ថ្ងៃ នៅថ្ងៃទី២៨-២៩ ខែតុលា ឆ្នាំ២០២៣។
រដ្ឋបាលខេត្តបាត់ដំបង នឹងមានការរៀបចំប្រណាំងទូក(ង)ខ្នាតប្រពៃណីជាតិ ទូកខ្នាតអន្តរជាតិ ទូកមង ទូកផ្កាចារ និង ហើយនៅពេលរាត្រីនឹងមានការរៀបចំបណ្ដែតប្រទីប បង្ហោះគោម និងបាញ់កាំជ្រួចជាដើម ដើម្បីអបអរសាទរពិធីបុណ្យចេញព្រះវស្សា និងការចូលរួម ចំណែកថែរក្សាទំនៀមទំលាប់ប្រពៃណីជាតិដ៏រុងរឿង ជាពិសេសទំនៀមទំលាប់របស់ខេត្តបាត់ដំបង។
រដ្ឋបាលខេត្តបាត់ដំបងអំពាវនាវដល់សាធារណជន ភ្ញៀវជាតិ និថអន្តរជាតិ និងប្រជាពលរដ្ឋទូទាំងខេត្តបាត់ដំបង សូមអញ្ជើញចូលរួមកម្សាន្តសប្បាយរីករាយ ដើម្បីអបអរសាទរពិធី បុណ្យចេញព្រះវស្សាឱ្យមានភាពឱឡារិកអធិកអធមច្រើនកុះករ។
ពិធីបុណ្យអុំទូកឆ្នាំនេះ រាជរដ្ឋាភិបាលបានប្រកាសថានឹងរៀបចំឱ្យសន្ធឹកសន្ធាប់ជាងឆ្នាំមុនៗ ក្រោយខកខានធ្វើនៅឆ្នាំ២០២២ដោយសារកម្ពុជាជាប់រវល់ធ្វើជាម្ចាស់ផ្ទះដឹកនាំប្រជុំកំពូលអាស៊ានលើកទី៤០-៤១ និងកិច្ចប្រជុំពាក់ព័ន្ធ។ តែយ៉ាងណានៅតាមបណ្តាខេត្ត និងតំបន់មួយចំនួននៅតែប្រារព្ធពិធីនេះឡើងយ៉ាងអធិកអធមផងដែរ។
កម្ពុជាតែងតែប្រារព្ធពិធីបុណ្យអុំទូក បណ្ដែតប្រទីប អកអំបុកនិងសំពះព្រះខែជារៀងរាល់ឆ្នាំ យូរលង់មកហើយ។ ពិធីបុណ្យ នេះ គេតែងប្រារព្ធធ្វើនៅទន្លេចតុមុខ ដែលមានរយៈពេល៣ថ្ងៃ គឺចាប់ពី ថ្ងៃទី១៤, ១៥កើត ដល់ថ្ងៃ១រោច ខែកក្ដិក និងពេលយប់ក៏មានការបណ្ដែតប្រទីបផងដែរ។ រីឯពិធីបុណ្យអកអំបុក និងសំពះព្រះខែវិញ គេ ប្រារព្ធធ្វើនៅពាក់កណ្តាលរាត្រីថ្ងៃ១៥កើត ខែកក្តិក តែប៉ុណ្ណោះ។
រាល់ពេលមានពិធីបុណ្យនេះ សង្កេតឃើញមានការចូលរួមយ៉ាងច្រើន កុះករពីសំណាក់ទូកង និងទូកចែវទាំងផ្នែកបុរស និងផ្នែកនារី ដែលបានធ្វើដំណើរមកពីបណ្តាខេត្ត និង ក្រុងនានានៅក្នុងព្រះរាជាណាចក្រកម្ពុជា មកចូលរួមប្រឡងប្រណាំងដែលមានទូកយ៉ាងច្រើនសន្ធឹកសន្ធាប់ ចំនួនរាប់រយគូដើម្បីក្រកួតប្រជែងដណ្ដើមយកជ័យជំនះឱ្យខេត្តក្រុងរបស់ខ្លួន និងដើម្បីជាការរំលឹកនឹកគុណដល់វីរៈភាពដ៏អង់អាចក្លាហាន ក្នុងការតស៊ូ ការពារជាតិ មាតុភូមិដ៏បវរនៃយើង៕
